CADERNO ABERTO
Galicia e Iberoamérica, un mundo literario por Miguel Anxo Fernán Vello

Con este título tan acaído, o PEN Clube de Galicia foi quen de organizar en Compostela un encontro literario que, sen dúbida, responde a un proxecto intelixente e atractivo que vai acompañado dunha xusta visión estratéxica, cal é situar o noso país como enclave simbólico e real do mundo das letras arredor do galego como idioma literario e de cultura: velaí, por exemplo, a rica urdime familiar do portugués no Brasil ou a galaxia expansiva do castelán no amplo espazo diverso iberoamericano. E Galiza como centro, como foco irradiante, como ponte interlingüística e intercultural. Porque o noso país está chamado a ser peza fundamental e primordial dunha cadea de intercambios enriquecedores, como soubo ver no seu día un emigrante compostelán chamado Gumersindo Busto, que concibiu a creación dunha Universidade Libre Hispanoamericana, soño aínda hoxe non realizado, e unha gran Biblioteca que levaría o nome de América, hoxe felizmente existente, instalada no Pazo de Fonseca e, por certo, cumprindo neste 2004 o seu centenario.

Tamén soubo ver isto a Asociación Internacional de Amigos da Universidade Libre Iberoamericana en Galicia (AULIGA), unha entidade -por certo, con sede legal na Biblioteca América- que se centra, desde hai anos, na creación dun foro iberoamericano que acolla e expanda a creación multilingüe dos países unidos basicamente polas linguas galega, castelá e portuguesa; que, en conxunto, como di AULIGA, forman unha "koiné" idiomática de seiscentos millóns de interlocutores. Por todo isto e por moito máis hai que saudar este encontro programado polo PEN Clube de Galicia, que trae á nosa terra, entre outros, ao poeta arxentino Horacio Armani; á tradutora e viúva de Julio Cortázar, Aurora Bernárdez; ao poeta brasileiro Alexei Bueno, á narradora panameña Gloria Guardia, ao poeta peruano Alfredo Pérez Alencart; á biógrafa de Borges e ensaísta, María Esther Vázquez, á novelista Nélida Piñón e ao poeta e presidente da Academia Brasileira de Letras, Iván Junqueira. E non me esquezo dos amigos Reynaldo Valinho, David Castillo, Ángel García López e Basilio Rodríguez Cañada. Todos eles e moitos máis, rodeados de escritores de noso, farán verdade un mundo literario galego e iberoamericano que resoa na historia e se proxecta no futuro.

MIGUEL ANXO FERNÁN VELLO